જામનગર : મન હોય તો ધૂળમાંથી પણ પૈસા પેદા કરી શકાય છે. પછી કાંટાથી લથબથ છોડની તો શું વિશાત ? જામનગરના એક ગામડાની બહેનોએ આજ સૂત્રને જીવન મંત્ર બનાવી ઘર બેઠા કમાણીનું સાધન બનાવ્યું છે અને જંગલી પશુઓ પણ જેનાથી દુર રહે છે તેવા અતિ કંટાળા હાથલાના પલ્પને હાલારથી કેનેડા મોકલવાનું કાર્ય આરંભ્યું છે.

કુદરતનું સર્જન માણસ માટે હંમેશા કોઇને કોઇ રીતે ઉપયોગી બનતું હોય છે. બાવળમાં કાંટા હોય છે. પરંતુ દાંત માટે તેનું દાતણ અકસીર છે. લીમડો કડવો છે, પરંતુ અનેક રોગો મટાડવા નિમિત બને છે. તેમ હાથલાનું નામ પડતાં તેના કાંટા નજરે પડે છે. પરંતુ આ કાંટાની વચ્ચે થતાં લાલ ડોડવામાંથી નિકળતો પલ્પ નેચરલ ટોનિકનું કામ કરે છે.

જામનગરથી જામજોધપુર વાયા સમાણાના રસ્તે લાલપુર તાલુકાનું ચારેબાજુ ડુંગરાઓથી ઘેરાયેલ ખટિયા ગામ છે. ખટિયામાં દસ બહેનો મળીને સખીમંડળ ચલાવે છે. આ સખીમંડળના એક સભ્ય જશુબેન હીરાભાઇ ખરા ખુબ મહેનતુ છે.

આ ગૃહિણી તેમના બે દિકરાને સાચવે, ઘરના સૌ માટે રસોઇ બનાવે અને એમાંથી સમય કાઢી હાથલાના ડોડવા ભેગા કરવામાં વિતાવે દસ-પંદર કે પચ્ચીસ કિ.મી.ની રઝળપાટ પછી ભેગા કરેલા હાથલાના લાલ ડોડવામાંથી નિકળતો પલ્પ અને તેમાંથી બનતું જયુસ જે શક્તિવર્ધક છે, એ અમદાવાદ, ઇન્દોર અને કેનેડા સુધી પહોંચ્યુ છે.

ઓર્ડર મુજબ રોજ ૨૦ થી ૪૦ લીટર આ જયુસ બનાવી જશુબેન પ્લાસ્ટીકના શીશામાં પેક કરી ઘર અને ઘરના સભ્યોને સાચવી મહિને પ થી ૭ હજારની આવક પણ મેળવે છે. હાથલાના ડોડવામાંથી પલ્પ નિકળવા સાથે હાથલા ખેતીવાડીમાં પાક ફરતે સંરક્ષણ માટે દિવાલનું પણ કામ કરે છે.

જશુબેન કહે છે કે હાથલા કુદરતની અણમોલ ભેટ છે. આયુર્વેદના જાણકારો હાથલાના જયુસ પીવાનો ખાસ આગ્રહ રાખે છે. કારણ આ જયુસ પ્રોટીન અને આયર્ન આપવા સાથે હીમોગ્લોબીન વધારે છે. કુદરતનું આ નેચરલ ટોનીક છે.