ગુજરાતના પવિત્ર યાત્રાધામ ખાતે ચાલતી ઉડન ખટોલા એટલે કે ટ્રોલી સેવાની સલામતી સામે પ્રશ્નાર્થ સર્જાય તેવો એક ચોંકાવનારો બનાવ 18 નવે.ના રોજ પંચમહાલ જીલ્લાના યાત્રાધામ પાવાગઢ ખાતે બન્યો હતો. જેમાં અચાનક જ ટ્રોલીઓ હવામાં અધ્ધવચ્ચે રોકાઈ ગઈ હતી. અને હિંચકાની જેમ ઝુલવા લાગતાં યાત્રિકોમાં ફફડાટ પેસી ગયો હતો.

આ અંગેની વિગત એવી છે કે 18નવે.ના રોજ રવિવારની રજા અને લાભપાંચમના તહેવારને કારણે પવિત્ર યાત્રાધામ પાવાગઢ ખાતે યાત્રિકોનો ભારે ધસારો હતો. જલ્દી દર્શન કરીને નીચે આવવા માટે મોટાભાગના યાત્રિકો ટ્રોલીનો ઉપયોગ કરતાં હોય છે. સાંજે લગભગ પાંચ વાગ્યાની આસપાસ યાત્રિકો દર્શન માટે ટ્રોલીમાં બેઠા. અને ધીમે ધીમે ટ્રોલી ઉપરની તરફ જવા લાગી. યાત્રિકોને દોરડાનો અવાજ કંઇક વધારે હોય તેમ લાગ્યું હતું અને ટ્રોલી પરાણે ઢસડાતી હોય તેવું લાગ્યું. પળવારમાં તો એકાએક તમામ ટ્રોલીઓ રોકાઈ ગઈ.

તે વખતે તમામ ટ્રોલીઓ ભરાયેલી હતી. એક ટ્રોલી કે જે ઉપરની તરફ પહોંચવામાં હતી તે એકાએક ઝુલાની જેમ હાલવા લાગી. હીજી ટ્રોલીઓ પણ હાલવા લાગી. તેમાં બેઠેલા સૌ યાત્રિકોના જીવ તાળવે ચોંટી ગયા. હમણાં જ જાણે કે ટ્રોલી નીચે પડી જશે એમ જણાતું હતું. ટ્રોલી સેવા પૂરી પાડતા સંચાલકો દ્વારા લાઉડ સ્પીકર પર કંઈક જાહેરાત પણ થઈ. સૌ યાત્રિકો એકબીજાના હાથ પકડીને બેસી રહ્યાં અને શું થશે તેની ચિંતામાં હતા. જો કે એનાઉસમેન્ટ બાદ તરત જ ધીમે ધીમે ટ્રોલી રાબેતા મુજબ ચાલવા લાગી અને ઉપર પહોંચ્યાં બાદ યાત્રિકોના જીવમાં જીવ આવ્યાં હતા. યાત્રિકો દ્વારા ફરજ પરના કર્મચારીને શું થયું હતું તેમ પૂછપરછ કરાતાં તેમણે ચિંતાતુર સ્વરમાં કહ્યું કે ઈમ્બેલેન્સ થઈ ગયું હતું. જો કે ત્યારબાદ ટ્રોલીઓ યથાવત ચાલતી હતી.

આ ઘટના બાદ યાત્રિકોના મનમાં સવાલો પેદા થયાં કે રજા કે તહેવાર દરમ્યાન વધુ વકરો મેળવવા સંચાલકો દ્વારા સલામતીની ઉપેક્ષા તો કરાતી નથી ને? ઈમ્બેલેન્સ એટલે શું ? આ સમસ્યા કેમ સર્જાઈ તેની કોઈ સ્પષ્ટતા કરાઈ નથી. હવામાં જમીનથી સેંકડો ફૂટ ઉપર હવામાં ઝુલાની જેમ હાલક ડોલક થતી ટ્રોલીઓ તુટી ગઈ હોત તો કેટલી મોટી ગમખ્વાર દુર્ઘટના સર્જાઈ હોત. એવા સમયે કોઈ યાત્રિકે બીકના માર્યા ટ્રોલીમાંથી ભૂસકો માર્યો હોત તો. આ તમામ શક્યતાઓ રહેલી હતી. ટ્રોલીના સંચાલકોની સરકારે કે જીલ્લા કલેક્ટરે આ બનાવનો ખુલાસો માંગવો જોઈએ કે એકાએક હવામાં ટ્રોલીઓ કે રોકાઈ ગઈ ? શું સંચાલકોની કોઈ બેદરકારી હતી કે કેમ. જેથી ભવિષ્યમાં આવી કોઈ ઘટના ના બને.નોંધનીય છે કે આ અગાઉ પણ પાવાગઢ ખાતે ટ્રોલીઓ તુટી પડવાની ઘટના બનેલી છે. જેમાં કેટલાક યાત્રિકોના નિધન પણ થયાં હતા. જમીનથી અધ્ધર હવામાં ઝુલાની જેમ હાલક ડોલક થતી ટ્રોલીની સલામતી માટેના શું પગલાં છે તે પણ સંચાલકો પાસેથી સત્તાવાળાઓએ જાણવું જોઈએ એવી યાત્રિકોમાં લાગણી પ્રવર્તી હતી.

PG/DP