પૂર્ણ ચંદ્રનાં કિરણોમાં તરબોળ થયેલ શરદ પૂનમને બધી જ પૂનમોમાં શ્રેષ્ઠ ગણવામાં આવે છે. આજે આસો સુદ પૂનમ એટલે શરદ પૂર્ણિમાને કારણે ચંદ્ર સોળે કળાએ ખીલશે. પ્રાચીનકાળથી જ શરદ પૂનમને ખૂબ જ મહત્વપૂર્ણ તહેવાર માનવામાં આવે છે. શરદ પૂનમથી હેમંતઋતુની શરૂઆત થાય છે. હિન્દુ પંચાંગમાં 12 માસની 12 પૂનમ હોય છે જેમાં શરદપૂર્ણિમા સર્વાધિક મહત્વપૂર્ણ છે. તેને રાસપૂર્ણિમા પણ કહે છે. શાસ્ત્રો અનુસાર જે વ્યક્તિ આ રાતે જાગે છે તેને ધનની દેવી મહાલક્ષ્મીની કૃપા પ્રાપ્ત થાય છે.

આજે ઘણી બધી જગ્યાએ એક દિવસના રાસ-ગરબાનું આયોજન કરવામાં આવે છે અને સાથે સાથે દૂધ-પૌઆની પ્રસાદી આપવાનું પણ આયોજન કરવામાં આવ્યું હોય છે. આ દિવસે દૂધ-પૌઆની પ્રસાદીનું મહત્વ હોય છે.

શરદ પૂર્ણિમાનું એક નામ કોજાગર પૂર્ણિમા પણ છે. તેથી તે દિવસે કોજાગર દેવી લક્ષ્મીજીની પૂજા કરવામાં આવે છે. આ પૂજા બપોરે 12 વાગ્યા પછી જ કરવામાં આવે છે. પૂજામાં લક્ષ્મીજીની મૂર્તિ ઉપરાંત કળશ, ધૂપ, દૂર્વા, કમળનું ફૂલ, ધનસંપત્તિ, અનાજ, સિંદૂર અને નાળિયેરના લાડુને વિશેષરૂપે ચઢાવાય છે.

પૂનમ ચંદ્રમાની તિથિ માનવામાં આવે છે. ચંદ્રમા મનનું પ્રતીક છે. આ પણ સમુદ્રમંથનમાંથી નીકળેલાં 14 રત્નોમાંનું એક છે.

DT/KP