જેસલમેર રાજસ્થાનની પશ્ચિમ દિશામાં આવેલાં રણવિસ્તારમાં આવેલું ખૂબ સુંદર શહેર છે. આ શહેરમાં આવેલ પૌરાણિક કિલ્લોઓ, પ્રાચીન મંદિરો તેમજ ઊંટની સવારીનો આનંદ માણવાના દરેક સાધન પ્રાપ્ત છે. દેશના સૌથી ગરમ શહેરમાં જેની ગણના થાય છે તે જેસલમેરને રેતીની જમીન પર આવેલા હાવાને કારણે તેને મેરૂ નામથી પણ ઓળખવામાં આવે છે.

જેસલમેરની સ્થાપના સન 1156માં ભાટી રાજા જેસલે કરી હતી અને તેણે 12 વર્ષ સુધી રાજ કર્યું હતું. ત્યારપછી આ શહેરનું નામ રાજાના નામ જેસલ પરથી પાડવામાં આવ્યું હતું. શહેરનું નિર્માણ પીળા પથ્થરોથી થયું હોવાથી તેને ગોલ્ડન સિટી પણ કહેવામાં આવે છે.

જેસલમેરમાં જોવાલાયક શું શું છે....

રાવલ જેસલ દ્વારા બનાવવામાં આવેલ સોનાર કિલ્લો 1156માં બનાવવામાં આવ્યો હતો. જે ત્રિકુટા પહાડી પર 80 ફૂટની ઊંચાઇએ આવેલો છે. પીળા બલુઆ પથ્થરોમાંથી બનેલા આ કિલ્લા પર સૂર્યનાં કિરણોની રોશનીને કારણે સોના જેવી ચમક આવતાં તેને સોનાર કિલ્લો કહેવામાં આવે છે.

જેસલમેરથી 42 કિમી દૂર સમના ટેકરાઓ આવેલા છે. અહીંથી સૂર્યાસ્તનો નજારો જોવો અદ્દભુત લાગે છે. તેની સાથે ઊંટ પર બેસીને રણની સવારી પણ કરી શકાય છે. જેસલમેરમાં ધનિક વ્યાપારીઓ દ્વારા બનાવવામાં આવેલી હવેલીની દીવાલ, બારી, બાલ્કનીમાં જીણી જાળીઓ, ઝીણું નક્શીકામ એટલું બારીકાઇથી કરવામાં આવ્યું છે જે માણવા એક અદ્દભુત લાહવો છે. આ હવેલીઓનું બાંધકામ 300 વર્ષ જૂનું માનવામાં આવે છે.

જેસલપુરથી સૌથી નજીક જોધપુર એરપોર્ટ આવેલું છે. જોધપુર જેસલમેરથી 300 કિમીના અંતરે આવેલું છે. ત્યાંથી બસ અથવા ટેક્સી કરીને પણ જઇ શકાય છે. જેસલમેરમાંથી તમે ઊંટના ચામડામાંથી બનાવેલ પર્સ, બેગ, બેલ્ટ વગેરે ખરીદી શકો છો.

DT