કેરો : ઈજિપ્તની શક્તિશાળી સેનાએ દેશમાં લોકતાંત્રિક રીતે ચૂંટાયેલા પ્રથમ રાષ્ટ્રપ્રમુખ મોહમ્મદ મુર્સીને પદભ્રષ્ટ કરી દીધા છે. આ સાથે ઈસ્લામાવાદી બંધારણ પણ બરખાસ્ત કરી દેવામાં આવ્યું છે.

સેના દ્વારા લોકોની માંગ સ્વીકારવા માટે મુર્સીને અપાયેલી 48 કલાકની મહેતલ પૂરી થયા બાદ આ પગલું ઉઠાવવામાં આવ્યું છે. ઈજિપ્તના લશ્કરી કમાંડર જનરલ અબ્દેલ ફેતહ અલ સીસીએ ટીવી પર એક નિવેદનમાં રાષ્ટ્રને સંબોધિત કરતા કહ્યુ હતુ કે રાષ્ટ્રપ્રમુખ મુર્સીની જગ્યાએ બંધારણીય અદાલતના મુખ્ય ન્યાયાધીશને પદસ્થાપિત કરવામાં આવ્યા છે. મુર્સી એક વર્ષ પહેલા જ આ પદ માટે ચૂંટાયા હતા.

ઈજિપ્તના હાઈ કોન્સ્ટીટ્યુશનલ કોર્ટના પ્રમુખ અદલે મન્સૂર છે. આ ઈજિપ્તની સૌથી ઉપલી અદાલત છે. ઈજિપ્તની સેનાએ બંધારણને બરખાસ્ત કરી દીધું છે. હવે ટૂંક સમયમાં રાષ્ટ્રપતિ પદની ચૂંટણીની ઘોષણા કરવામાં આવશે.

અલ સીસીએ કહ્યુ હતુ કે સેના મુર્સીને પદભ્રષ્ટ કરીને દેશને બચાવવા માટેની ઐતિહાસિક જવાબદારી પૂરી કરી રહી છે. મુર્સીને હાલ નજરકેદ રાખવામાં આવ્યા છે.


JD / YS