નવી દિલ્હી : ભારતના માસ્ટર ટેનીસ ખેલાડી લીએન્ડર પેસ અને સોમદેવ દેવબર્મને એ.ટી.પી ટેનીસ ટુર્નામેન્ટમાં શાનદાર પ્રદર્શનથી જીત મેળવી ક્વાર્ટર ફાઈનલમાં જગ્યા બનાવી લીધી છે. તો બીજી તરફ દિવિજ શરણ અને પુરવ રાજાની જોડી હારી જતા ટુર્નામેન્ટમાંથી બહાર થઇ ગઈ છે.

પેસ અને તેના જોડીદાર ડેનિયલ બ્રાસીયાલીએ અમેરિકાના જેમસ કૈરેટાની તથા કેનેડાના આદીલ શમાસદીનની જોડીને 7-5, 7-6 આસાનીથી હાર આપી આગામી રાઉન્ડમાં પ્રવેશ કરી લીધો હતો. બીજી બાજુ દીવીજ અને પુરવની જોડીને પ્રથમ રાઉન્ડમાં જુઆન સબેસ્તિયન કબાલ અને રોબર્ટ ફરાહની જોડી સામે 5-7, 5-7 થી હાર મળી હતી.

જુઆન સબેસ્તીયન કબાલ અને રોબર્ટ ફરાહની જોડી આગામી મેચ પેસ અને બ્રાસીયાલી સામે રમશે. બીજી તરફ મલેશિયા ઓપનમાં સોમદેવે દક્ષિણ આફ્રિકાના રીક ડી વોએસ્ટ સાથે મળી સ્પેનના પાબ્લો અન્દુજાર અને રોમાનિયાના વિક્ટર હોનેસ્ક્યું સામે 6-3, 6-2 થી આસાન જીત મેળવી હતી આ જોડી આગામી મેચ ફ્રાંસના જુલીયન બેનેટ્યું અને સર્બિયાના નેનાદ જીમોનજીક સામે રમશે.

KT/DT