ગોંડલ : ગોંડલમાં ગુજરાતની સૌથી મોટી પતંજલિ ચિકિત્સાલયના ઉદ્દઘાટન પ્રસંગે આવેલા વિખ્યાત ફિલ્મ એક્ટ્રેસ સુધા ચંદ્રને દેશના વડાપ્રધાનપદે નરેન્દ્ર મોદી હોવા જોઈએ તેવો સૂર વ્યકત કર્યો હતો.

પોતાના જ જીવન પર બનેલી ફિલ્મ ‘નાચે મયુરી’માં જોરદાર અભિનય કરનાર સુધા ચંદ્રન માને છે કે હાલ દેશની હાલત સારી નથી. હૈદરાબાદ ખાતે મોદીએ સભા ગજવી અને તેમાં એક લાખ લોકો પણ ભેગા થયા હતાં ત્યારે હવે સાઉથની અભિનેત્રી સુધા ચંદ્રન પણ માને છે કે દેશના વડાપ્રધાનપદે મોદી જ ફીટ છે.

સુધા ચંદ્રને જણાવ્યું કે “મારી અંતરની ઈચ્છા છે કે આવનારા દિવસોમાં નરેન્દ્ર મોદી જ દેશના વડાપ્રધાન બને અને તેમને વડાપ્રધાનપદે જોવાની મારી અદમ્ય ઈચ્છા પણ છે.”

તેમના આ નિવેદનમાં તારક મેહતા ફેમ અભિનેત્રી નેહા મહેતાએ પણ સૂર પૂરાવ્યો હતો અને જણાવ્યું હતું કે મોદી જ સૌથી આગળ છે.

ગુજરાતી ફિલ્મો અંગે સુધા ચંદ્રને જણાવ્યું હતું કે મેં પણ ગુજરાતી ફિલ્મોમાં ઉપેન્દ્ર ત્રિવેદી અને કિરણ કુમાર સાથે કામ કર્યું છે. ગુજરાતી ફિલ્મ એટલા માટે નથી ચાલતી કે કારણ કે ગુજરાતી લોકો જ તેને જોવા નથી જતા. ઘણી સારી ફિલ્મો બને છે અને હવે તો તેમાં પણ સારી ટેક્નોલોજીનો ઉપયોગ થવા લાગ્યો છે પણ ગુજરાતી ફિલ્મને સફળ બનવા માટે ગુજરાતી દર્શકોએ જ ફિલ્મ નિહાળવી પડશે.

કિરણ આચાર્યે જણાવ્યું હતું કે હવે ગુજરાતી ફિલ્મમાં પણ સારી કથાવસ્તુ આવી છે અને છેલ્લી કેટલીક ફિલ્મો તો બહુ જ ચર્ચામાં પણ રહી છે. વિવેચકો દ્વારા પણ તેના વખાણ થયા છે અને ગુજરાતી ફિલ્મનું ભવિષ્ય સારું જ છે.

KP