નવી દિલ્હી : ફીટકાર મળ્યા પછી કેન્દ્રીયમંત્રી બેનીપ્રસાદ વર્માએ કહ્યુ કે ખુદ અપમાનિત મહેસૂસ કરી રહ્યા છે અને જો તેઓને સપા પ્રમુખ મુલાયમસિંહ યાદવની વિરુદ્ધ લડાઈ લડવાથી રોકવામાં આવશે તો તેઓ કોંગ્રેસ છોડી દેશે.

વર્માએ અખિલ ભારતીય કોંગ્રેસ કમિટીના ઉત્તરપ્રદેશના પ્રભારી મધુસૂદન મિસ્ત્રીના એ દાવાને નકાર્યો હતો કે તેઓએ ખેદ વ્યક્ત કરીને વચન આપ્યુ કે ફરી ક્યારેય મુલાયમસિંહ વિરુદ્ધ કંઈ નહીં કહે. વર્માએ સપા પ્રમુખને ફરી એકવાર નિશાન બનાવતા કહ્યુ હતુ કે બાબરી મસ્જિદ વિધ્વંસ માટે તેઓએ ભાજપ સાથે સાંઠગાંઠ કરી હતી.

વર્માએ પત્રકારો સાથે વાતચીતમાં જણાવ્યુ હતુ કે મારા પૂતળા સળગાવવામાં આવ્યા હતા. હું અપમાનિત સ્થિતિ અનુભવું છું. હું ખુરશી માટે કે મંત્રી બનવા માટે રાજનીતિમાં નથી. હું મૂલ્યોમાં વિશ્વાસ કરૂં છું. હું કોઈપણ સમયે કોંગ્રેસ છોડી શકું છું કે કોંગ્રેસ મને હટાવી શકે છે. જો મુલાયમ સાથેની મારી લડાઈમાં કોંગ્રેસ અવરોધ બનશે તો હું મારું રાજીનામુ આપી દઈશ.

ઉલ્લેખનીય છે કે કેન્દ્રીયમંત્રી બેનીપ્રસાદ વર્માએ થોડા દિવસો પહેલા જ મુલાયમસિંહ યાદવ અંગે વિવાદાસ્પદ નિવેદન આપી હોબાળો મચાવ્યો હતો. તેમણે કહ્યુ હતુ કે મુલાયમ તો વડાપ્રધાનના ઘરે ઝાડૂ લગાવવા માટે પણ યોગ્ય નથી.


JD / YS