નવી દિલ્હી : ઉત્તરપ્રદેશમાં યમુના નદીમાં ગેરકાયદે ખનન મોટા પાયે ચલા છે. રેતી માફિયાઓ દરરોજ સરકારને લાખો રૂપિયાની મહેસૂલી આવકનો ચૂનો લગાવી કરોડોનો માલ લઈ જાય છે. ખનન માફિયાઓ વિરુદ્ધ કાર્યવાહીઓ કરીને ખળભળાટ મચાવનાર ગૌતમ બુદ્ધ નગરની મહિલા એસડીએમ દુર્ગાશક્તિ નાગપાલને સસ્પેન્ડ કરી દેવાતા ખનન માફિયાઓ ગેલમાં આવી ગયા છે. જ્યારે બીજીતરફ આ મહિલા આઈએએસ અધિકારી દુર્ગાશક્તિ નાગપાલને સસ્પેન્ડ કરવાની ઘટનાને યોગ્ય ગણાવતા ઉત્તરપ્રદેશના મુખ્યમંત્રી અખિલેશ યાદવે તર્ક રજૂ કર્યો હતો કે તેમના આદેશથી રબૂપુરામાં સાંપ્રદાયિક તણાવ પેદા થયો છે પણ તેમના આ તર્કની હવે હવા નીકળી ગઈ છે.

વાસ્તવમાં ગૌતમ બુદ્ધ નગરમાં સ્થાનિક પોલીસે એ દલીલ નકારતા કહ્યુ હતુ કે આ વિસ્તારમાં કોઈ સાંપ્રદાયિક તણાવ નથી સર્જાયો.

પોલીસના આ દાવાની વિશ્વસનીયતા એ વાતથી વધે છે કે રાજ્ય સરકારને આ વિસ્તારમાં કોમી તણાવ સંબંધિત કોઈ ફિલ્ડ રિપોર્ટ મળ્યો નથી. ગૃહમંત્રાલયના કેટલાંક સૂત્રોના જણાવ્યા પ્રમાણે કોઈપણ અધિકારી વિરુદ્ધ આ પ્રકારના ગંભીર નિર્ણયોની પહેલ ફિલ્ડ રિપોર્ટના આધારે કરવામાં આવે છે. રબૂપુરા પોલીસ સ્ટેશનના સીનીયર સબ ઈન્સ્પેકટર અજય કુમારે કહ્યુ હતુ, “આવો કોઈ કોમી તણાવ નહોતો. તમે ગૌતમ બુદ્ધ નગરમાં હાજર મીડિયાકર્મીઓને પુછી શકો છો.’

JD/DT