ગુજરાતમાં ફાટી નીકળેલા 28, ફેબ્રુઆરી 2002ના ગોધરા કાંડ પછીના કોમી રમખાણોના 10 વર્ષ પછી આજે નરોડા પાટિયા કેસનો ચુકાદો આજે મુલતવી રાખવામાં આવ્યો છે. હવે સ્પેશિયલ કોર્ટે સુનાવણી પછી આજે આ ચુકાદો આગામી 29 ઓગસ્ટ સુધી મુલતવી રાખ્યો છે.

આજે થયેલી સુનાવણી દરમ્યાન 3 આરોપીઓ કોર્ટમાં હાજર થયા નહોતા. જેના પછી જજે તમામ માટે બિન જામીનપાત્ર વોરંટ જારી કર્યા છે. ઉલ્લેખનીય છે કે નરોડા પાટિયા કેસમાં 95 લોકોને જીવતા સળગાવી દેવાયા હતા અથવા તેઓની હત્યા કરી દેવામાં આવી હતી.

આ મામલે 62 લોકોને આરોપી બનાવવામાં આવ્યા છે. આરોપીઓમાંથી એકનું મોત ટ્રાયલ દરમ્યાન જ થઈ ગયું હતું. રમખાણોમાં સામેલ હોવાનો આરોપ અનેક નેતાઓ પર પણ લાગ્યા છે. જેમાં એક નેતા માયા બહેન કોડનાની પણ સામેલ છે.

ગુજરાત પોલીસ પાસેથી આ કેસની તપાસ પછી સિટને સોંપી દેવામાં આવી હતી. માયા બહેન કોડનાની ઉપરાંત આ મામલે વિહિપ નેતા બાબૂ બજરંગી અને જયદિપ પટેલ પણ આરોપોમાં સંડોવાયેલા છે. ઉલ્લેખનીય છે કે આ કેસ સાથે માયા કોડનાની, બજરંગી અને જયદિપ પટેલનું ભવિષ્ય જોડાયેલું છે.